Mii davvisámegielat studeanttat ráhkkaneimmet giellariššui Ubmis. Fádda lei ealáhus ja ámmáhat. Seammás galggaimet čalmmustahttit našunálabeaivvi.

Mánát leat juohke agis. Ja oarjelsámegielat studeanttat ráhkkanedje iežaset gillii doaimmaid.

Mun árvalin gullid oaggut maid leat ámmátnamahusat ja gullevaš reaiddut. Nubbi árvalii duodjesániid oahpahit niesteseahka ja govvamuittášanspealu (memory) bokte. De galggaimet vel filmma geahččat násunálabeaivveávvudeami birra.

Boradanboddus gávdnoje listtut boradan- ja biebmosániin ja de sihke davvi- ja lullisámegiel oahppit ja oahpaheaddjit gulahalaimet.

Jurdda lei aivve hupmat sámegiela, maiddái instrukšuvnnaid ja buot.

Mo čovddiimet:

Filmma luoikaimet Oahpponeavvoguovddážis neahta bokte.

Ámmátnamahusaid guolleminsttár: ámmat_giella2016
Oaggunstákkuid ráhkadin ieš. Mun ostten bambussákkiid lieđđerámbuvrras, láiggi ja magneta (guollái ja stággui) ostten buđildanbuvddas (hobbybutikk).

Niesteseahka dujiiguin ja govvamuittašanspealu luoikkaimet Deardna sámeskuvllas.